新潮又高質的素食

母親節時剛要出TRIP，返到香港約返媽媽食飯，心血來潮想食齋，搵搵下就搵左呢間。上年已經試過同一間係尖沙咀嘅分店，今次就試試銅鑼灣。

晚餐分6:00 & 8:00 兩輪，如果唔訂位，可賞試walk in…咁就唔會限定6:00 或 8:00。

呢到嘅價錢係偏貴的，但份量都有返咁上下，我地4大1小，叫左2個套餐，1個兒童餐，及散叫2個餸，已經好飽。

其中最意想不到嘅，係素食都會有兒童餐，姨甥見到就話要。飛機造型正好合小朋友心意，成日問點解飛機仲未到，我地唯有答佢，飛機要載住你叫嘅餸，好重，所以飛耐D….

兒童餐一D都唔求其，有意粉、生果、漢堡，全部都岩小朋友口味，即使姨甥係食肉獸，仍食得津津有味。可惜原本嘅芝士條，但臨時變左春卷。

另外叫嘅set dinner，有前菜+手卷+湯+主食+甜品，真係好豐富。

前菜：麻醬沙薑豆絲粉皮 + 紅菜頭蘋果香橙伴合桃 + 華都夫薯仔松子冰菜沙律

豆絲好似肉，與雞絲粉皮好似，加埋麻醬好開胃。

而紅菜頭&蘋果好新鮮，紅菜頭軟軟地，蘋果爽脆，夾埋一齊食幾好口感。

至於冰菜沙律，我係第一次生食冰菜，好清新，但都係中意食炒熟左嘅冰菜….

湯：黑松露忌廉磨菇濃湯 + 茶樹菇竹笙黃耳百合燉湯

因為叫左2個套餐，所以中湯西湯各叫一碗。

磨菇濃湯好creamy，菇味好濃，爸爸唔好西餐都中意，然而黑松露味就唔太特出。

中湯好足料，好清，雖然只係素菜湯，但味道豐富，飲出清新味道。

手卷：蘆筍素香鬆苜蓿芽手卷 + 香芒牛油果苜蓿芽手卷

無飯嘅手卷，以苜蓿芽代替飯，建議要即刻食，因為隔耐左紫菜就會唔脆。苜蓿芽無草清味，亦有清新感覺，用佢黎代替飯好特別。

套餐主食：牛肝菌忌廉燴扁意粉伴香脆腐皮卷 + 紅咖喱野菜猴頭菇配印度薄餅及珍珠米飯

腐皮卷整到好似雞脾咁，好得意，雖然有忌廉汁，但腐皮卷仍然香脆，意粉唔會太cream，不過父母始終中意中式，所以唔太好呢個意粉。

雖然餐牌講左紅咖喱會少辣，但唔食辣嘅我，都可以食到，唔覺辣。有唔同嘅蔬菜，而用印度薄餅配咖喱汁一齊食，簡直perfect，咖喱汁好香，有少少椰汁味，真係好有衝動另外叫多幾件薄餅點汁食。

散叫主食：宮保菇丁 & 梅菜扣玉

宮保菇丁可以揀走辣，D菇丁好似食緊真嘅肉，咬落有D似生炒骨嘅肉丁，汁好「惹」味，送飯一流。

梅菜扣玉相對遜色少少，豆腐唔夠豆味，梅菜較淡，汁亦較少，有待改進。

甜品：杏汁椰香紅豆糕 + 紫薯乳酪蛋糕

紅豆糕有好香好濃嘅杏仁味，無被椰汁搶左味到，我中意杏仁，所以覺得好味。但如果不嬲都唔中意杏仁味，就唔好叫呢款甜品喇。

乳酪蛋糕質感似cheesecake，呢個有驚喜，食落無cheesecake咁膩，反而帶少少酸味，食完唔會有飽滯感，可以來多幾件。

餐廰環境：藍白主色，好舒服，位與位之間有一定距離，無壓逼感。

悠蔬食

網上訂座即賺里數    

網址: https://s.openrice.com/QrbS0JQO600

地址: 銅鑼灣渣甸街50號渣甸中心25樓

電話: 35656393

~~~~~~~~~~~~~~~~~~~~~~~~~~我是分界線~~~~~~~~~~~~~~~~~~~~~~~~

Nico部屋

Facebook Page

http://www.facebook.com/nicoheya

Instagram

https://www.instagram.com/nico_heya/